Yiwen n wass d yimeksawen n Lmecta (Bgayet)

Yiwen n wass d yimeksawen n Lmecta (Bgayet)

Tasaεett d lxemsa n tmeddit iṭij mazal yesṭenṭun, mi neṭṭef abrid d yimeksawen yettεezziben deg udrar n Lmecta i d-yezgan di tɣiwant n Iɣrem tama Uqbu. Nεebba awεin ɣef tuyat, nuɣ abrid metwal Azru-n-Ṭhur. Taεwint ideg newweḍ ad nesgunfu, ad nseww cwiṭ waman, yeḥma lḥal, rnu abrid yessawen, ḥercaw yeččur d aẓru.

Nedda azal n 2 swayeε ɣef uḍar ; tiɣilt tettak-aɣ i tayeḍ, tin yekfan ad d-tban mazal tayeḍ. Newwi abrid d azdaw armi d lewhi n 7 yiḍ i newweḍ. Anebdu d anebdu, ussan ɣezzifit. Neqsed kan lweqt ideg d-ttruzun yimula. Mi nejba nufa s akken kan i d-ssuɣulen yimeksawen ɣer usensu, zwaren-d yizgaren d yiserdyan, ma d ulli d tɣeṭṭen negra-ten ; ttfaṛasent takessawt i tasmuḍi, llan-asent-id lmendad Karim d Zahir s ufella yiwen n ucfur i d-yezgan ɣef yiwet n tiɣilt. Ɛussen-tent-id maɣef ad tent-yesredwi wuccen. Uccanen n unebdu uɛren, yakan d netta i as-yennan “anebdu yumayen” seg wakken ulac dacu ara yečč deg unebdu.

Akken kan i d-tɣelli tdamcact, dɣa kecmen-d yimekswen s lmal-nsen. Ulli d tɣeṭṭen ɣer tezribt ma d izgaren yakan zwaren ɣer usensu. Nezha tagnit yid-sen. Necɛel taftilt n zzit, ulac trisiti deg umkan-a. Karim yerra ɣer wulli ad tent-id-yeẓẓeg, ad aɣ-d-yexdem aguglu neɣ yaourt kabyle, d acu kan wagi ur ẓid ara am winna n Sumam : d lliqa uqurḍaε swayes i t-id-xedmen. Tagnit kan akka, ata yuli-d Karim gar tɣeṭṭen yegla-d s ubriq n giguẓ yeččur d ayefki – abriq ideg d-iteddu uyefki n warrac di ddula n Bumdyen –. Iseffa-t akken iwata dɣa yerna-yas 5 tmiqwa n lliqa, yerwit almi i ires, yerra-t ɣer tewεint ad d-yismiḍ. Zahir yelha-d d imensi yecεel abaqur n tmes, yerra i lqut-nni i d-yugaren ɣef yimekli ad d-yeḥmu : tudert n umeksa meskin yectaqen taleqqimt yeḥman ad tt-yečč ɣef yidammen-is kan akken teḥma. Ma d nekni, allen-nneɣ ɣer uguglu-nni melmi ara yismiḍ. Yewweḍ-d lawan n yimensi nsers-d ad nečč, imeksawen-nni rran ɣer lmakla d-seḥman akked wayen i asen-newwi si temdint. Ma d nekk d umdakel-iw, nerra ɣer uguglu-nni yuɣal amzun d afermaj... ečč kan.

Mi necca neswa, neffeɣ-d berra i tεecciwt iwakken ad “nedijiri”, ad d-nessiwel ar temdint dinna yella le champ. Nerra metwal yiwet n tiɣilt tebbuḥra. Tizi am wass tbedd ɣef yeẓran, di taggara n waggur i nella. Yensa lḥess, ur tselleḍ i kra n zzhir, la ḥarus la barus, ala uccanen i yeskiεwiwen si llaẓ di tegnit ɣer tayeḍ. Nekni nerra-tt i uqesser d unecraḥ akked yimeksawen-nni. Ldin-aɣ-d ulawen-nsen, ḥkan-d uguren i d-ttemlilin di tkessawt. “Lukan nesɛa isensa yelhan, bnan akken ilaq, ur aɣ-reglen ara yizgaren di lawan-nni n ṭikuk. Lid-nneɣ ar tkessawt neɣ ar tririt n yizgaren”, i d-yenna Zahir. Nkemmel-as akken almi iruḥ iɛedda yiḍ di nsaf, dɣa nkecm-d ar tεecciwt nexmet, nesɛedda tanafa sufella yiwet n tkertult, ndel snat n tjerduɛin d ẓawra n lεesker.

Azekka-nni, mi tefrari tafat yuli wass, nekker-d nerra metwal asif nessared udmawen-nneɣ. Zahir yeswejed-aɣ-d lqahwa s uyefki n tɣeṭṭen. Karim yessufeɣ-d izgaren d wulli iwelleh-iten metwal Aẓru-n-Ṭhur. “Axaṭer, ass-a lemqil dinna ara yili. Yakan tella ttebyita dinna. Meqqar ad d-nečč seksu. Fihel ma nεawed-d i useḥmu.”, i d-yenna Zahir.

Ma d nekni mi neswa kan lqahwa s uyefki n taɣaṭ, newwi-d yid-neɣ timuqlin n zeεter aquran d tbelyunt n uyefki i aɣ-d-fkan yimeksawen-nni ; nuɣ-d abrid n tuɣalin.

Ur ntettu ara tagnit nesεedda d yimeksawen-nni i d-yellhan-d yid-nneɣ akken ilaq. Ziɣ akken qqaren “Ddiq deg wulawen kan i yettili”.

Brahim Benhamouche
[img]url=https://servimg.com/view/12783329/335][/url][/img]