Nezla (Suq lhed)
Mi yella lebɣi, kulci yeshel.
Mi ara temlil tasa akked d lebɣi, kra yellan yebεed ad yettban yeqreb ! D wa i d tbut i d aɣ -d-yesbgen Buxruf Ḥakim d yerfiqen-is i d-ibegsen i leqdic yugaren tuyat-nsen s waṭas deg ass n yennayer-agi yezrin.
Tasebḥit n yennayer imezdaɣ n taddart, i d- yezgan, ɣer tama umalu n Suqq n lḥedd deg tɣiwant n Timzar di lεerc Nat Jennad, ukin-d ɣef umaynut. ɣef ayen urǧin yusa-d di lbal-nsen. Si yal tama n taddart senjaq n tmuzɣa rrif n win n leẓẓayer yettrefrif s ttnefxa , iḥulfa ccan-is yulli. Yuɣ lḥal uqbel tafrara i yekren yelmeẓyen n taddart-agi akken ad heggin annar d kra ilaqen bac ad ticbiḥ taddart wa ad tesεu udem iwulmen s wacu ara tmagger inebgawen ara d-yerzun fell-as si yal amdiq. Deg akken xedmen s lmul, taddart n Nezla tuɣal tettfeǧǧiǧ s tumert akked unecraḥ. Kra n win yerzan fell-as yuɣal-d s wul fessusen.
Ɣer tama n Buxlef Ḥakim zdin yilmeẓyen niḍen, yefkan laεtab i terwiḥt ddaw leεnaya n uqerru n taddart Mass Ussan Akli, am Buxlef Murad, Zenia εaziz, Nezla Hakim, Xarxur Lunes, Tigruja Muḥend, Hamened Dris , Ghersem d wiyaḍ…
Taddart Meǧǧa tefka-d afus deg leqdic -agi yesawalen i yisaɣ. Wa s uniwel n seksu( tilawin) wa s usewwi, ma d ifaelllaḥen wa yefka-d iyuẓaḍ, wa awren wa allen i ilaqen akken tamaɣra ad tegrez. Am wakken id aɣ-d-nnan wid yellan defir leqdic-agi: ulac win umu ur yeεjib ara lḥal, ulac win yukren aḍar.
Yenna Mass Buxlef: “ d tagi i tikkelt tamezwarut deg ara yilli leqdic yecban wagi deg taddart-nneɣ. Tikelt-a ur nebɣi ara ad nessimɣur ugar n wanect-a. Aya tettwalim yeḍra ass-agi d aεbar amezweru kan. D aεbar ara d-iḍefren wiyaḍ ara yesεun sḍa ugar n waya. Lebɣi-nneɣ ad nili nenjer asalu i deg ara lḥun wiyad s tuget n ifaden akked d tawilat. Ma d ass-a imi d-rzan anect-a n yemdanen ɣer taddart-nneɣ, imi zdint am yiwen ɣer yidles, atan lferḥ-nneɣ yenekmel nnig wayen nessarem. Ayen diɣ yesefraḥen d arrac-nneɣ id-begnen belli zemren i teεkemt ulama zẓayet aṭas. Ihi tasuta mazal attan bxir, idles-nneɣ aten gar ifasen yelhan. Ulac tugdi fell-as”
Iswi n yimebdren ɣef leqdci-agi ad d-tlal yiwet n tidukkla ara yilin d tunṣibt, ara yazlen ɣer kra n win teεna temsalt akken ad d-ḥellin allalen i wulmen i usnerni n yidles akked d urasi n lεada-agi deg alaɣen n yimdanen. Aεeqqa n lhu atan deg akal, yeggra-d kkan ad t-swen akken ad yefk imɣi ɣef ayeg ara yili lettkel. Imɣi ur yeseknuy waḍu. Tameɣra n yennayer deg Nezla yulli ccan-is imi tella din B.R.T.V akked d Beur TV yulli ccan-is imi diɣ tuɣal d tajmilit tajmil I Kačču acennay n wawaras akked Ḥamed Ḥamani n ugraw agraɣlan Amaziɣ. Wa d asurif amenzu, maεna am wakken id as-yenna Muḥya: Mazal lxir ar zdat. Nekni ad d-nini tajmilt-nwen ay arrac!
Ait Slimane Hamid
Sujet: Mi yella lebghi, kulci yeshel. 
Lun 18 Jan - 11:54