“Aneggaru ad yerr tawwurt yeččur usqif n ttmana”
Urar ajdid
Ɛeddan xemsa n yiseggasen degmi tewwi tceqquft “Aneggaru ad yerr tawwurt yeččur usqif n ṭṭmana”, urar umezgun n tdukla tadelsant Numidya n Wehran arraz amezwaru n turart (le 1er Prix de la scénographie) di tfaska di Tizi Wezzu. Aseggas-ayi, mi teẓra tarbaɛt-ayi n Wehran belli mazal urar-ayi ad yeɛjeb i win ara t-yeẓren, bdan lxedma deg-s ilemẓiyen ijdiden iwakken ad iɛiwed urar xir n yiseggasen iɛeddan. Dɣa, ass n lǧemɛa, uraren taceqquft-a yilemẓiyen n tdukla tadelsant Numidya n Wehran deg uxxam n umezgun Ɛabdelqader Alloula. D acu kan, tarbaɛt-ayi n Numidya mačči d tin ara d-yinin nelḥeq neɣ dayen nessen kulci. Dɣa, nejmaɛen deg uxxam n tdukla-nsen iwakken ad meslayen ɣef wayen ixxusen di lxedma-ayi tajdidt. Ayen yessefraḥen aṭas, d imi ad d-tas terbaɛt n umezgun n Numidiya ɣer tmurt n yiqbayliyen gar ass n 25 ar 31 yulyu 2009 iwakken ad turar udem-ayi ajdid n tceqquft. Ad zwiren di Tizi-Wezzu di tfaska “Yusef Uqasi”. Ad tkemmel syin ɣer Sṭif, Burǧ Bu Ɛrrarrij, Bgayet akwed Tubirett. I win ur neẓri neɣ ur nesli s wurar-ayi n tdukla tadelsant Numidya n Wehran “Aneggaru ad yerr tawwurt yeččur usqif n ṭṭmana”, d urar i yerran tajmilt i yifennanen i d-yefkan aṭas i yidles-nneɣ, gar-asen Ɛabdelqader Alloula, Kateb Yacin, Abderraḥman Kaki, Ɛezdin Meǧǧubi, Bumedyen Sirat, Maɛtub Lwennas melba ma nettu Muḥya.Si Wehran, Amastan.S
Sujet: Aneggaru ad yerr tawwurt ....urar ajdid 
Lun 13 Juil - 12:01